Belaunaldien arteko programak gizarte- eta hezkuntza-arloko esku-hartzeak dira, eta pentsatuta daude adin desberdinetako pertsonek beren artean harremanak izan ditzaten, ezagutzak eta esperientziak truka ditzaten eta, horren ondorioz, aldaketa esanguratsuak gerta daitezen, bai parte-hartzaileen artean, bai haien komunitateetan. Antzeko emaitzak eguneroko bizitzan berez lor daitezkeen arren, esku-hartze horiek lortzeko aukera handiagoak dituzte, betiere ondo diseinatuta eta gauzatuta badaude.

EDE Fundazioak Bizkaiko Foru Aldundiarentzat argitaratutako gida honek inspirazio, motibazio eta laguntza gisa balio nahi du belaunaldien arteko programak gauzatzeko edo ikuspegi hori lehendik dauden ekimenetan txertatzeko. Programa horiek zertan dautzan eta zer potentzial duten aurkeztu ondoren, dokumentuak programa horiek sortzeko eta abian jartzeko metodologia erraz bat iradokitzen du. Metodologia horretan, programa bakoitzaren balizko lan-faseak eta arrakasta-gakoak deskribatzen dira. Gidak beste erakargarritasun bat ere badu: komentatutako hamaika esperientzia erreal hautatu dira, hainbat eragilek (administrazio publikoa, ikastetxeak, hirugarren sektorea, enpresak) parte hartzen duten eta hainbat esku-hartze eremutan (enplegua, teknologia berriak eta berrikuntza, jasangarritasuna, hezkuntza eta gizarteratzea) kokatzen diren programekin.