Biztanleriaren zahartzea egitura demografikoa eraldatzen ari den fenomenoa da, eta erronka sozial eta ekonomikoak planteatzen ditu, bai maila globalean, bai Espainian. Azken urte hauetan adinekoen ehunekoak nabarmen egin du gora, eta datozen hamarkadetan ere hala egingo duela aurreikusten da. Egoera horrek agerian uzten du oso garrantzitsua dela adinekoak aktibatzeko politikak ezartzea, zahartze aktiboaren kontzeptua ardatz hartuta, pertsonek gizartean parte hartzen jarrai dezaten, beren nahien eta gaitasunen arabera. Baina, adinekoen potentziala eta gizartean duten funtsezko rola identifikatu diren arren, adinekoen aurkako jokabide edadistak garrantzi handiko arazoa izaten jarraitzen dute, bai harremanei dagokienez, bai instituzioei dagokienez, eta gobernuek irmo jardun behar dute.

Azterlan honetan arazo horiek aztertu dira, eta bereziki aipatu da Espainiaren eta Europar Batasunaren egoera. Adineko emakumeek erronka espezifikoei egin behar diete aurre, batez ere lan-merkatuko ibilbide desberdinetatik eta bizitza osoko zaintza-lanen gainkarga handiagotik eratorriak, zahartzaroan mantentzen direnak. Gizonek baino bizi-itxaropen handiagoa dute, baina osasun oneko bizi-itxaropena txikiagoa da. Adineko emakumeak bereziki garrantzitsuak dira adinekoentzako aktibazio-politikak definitzerakoan; izan ere, gehiengoa dira adineko adin-taldeetan, eta premia handiagoak dituzte mendetasunari arreta emateari dagokionez.