Koaderno hau "Eskubideetatik abiatuta adineko pertsonekin gizarte inklusiboa eta lagunkoia eraikiz" bildumaren parte da. Bilduma horren helburua da herritar guztiak sentsibilizatzea adinekoek aurre egin behar dioten diskriminazioari buruz, gizarte- eta berdintasun-politikak hobetzen eta sustatzen laguntzea, eta adineko gizon eta emakumeen ahalduntzea sustatzea, beren eskubideak ezagutu eta erreklama ditzaten.

Bildumako lehen koaderno honek erraz aztertzen du arazo oso konplexu eta handi bat: adineko pertsonenganako indarkeriaren eta diskriminazioaren dimentsio desberdinak. Argitalpen honetan, gainera, edadismoak genero-arrazoiengatiko diskriminazioarekin eta beste gizarte-desberdintasun batzuekin duen lotura jorratzen da, eta zenbait proposamen egiten dira tratu ona sustatzeko eta adinekoen aurkako diskriminazioa, abusua eta tratu txarrak ezabatzeko.