María Ángeles Durán soziologoa eta hamarkadetan ikerkuntza feministaren ikur izandakoak gidari duen Emakundek argitaratutako artikulu-bilduma honetan zaintza-rolaren transformazio-bidean egin beharrekoak lantzen dituzte sei adituk. Izaskun Landaidak hitzaurrean azaltzen duen moduan, testuaren xedea da premiazko gizarte-aldaketa gerta ahal izateko eztabaida bideratzen ahalegintzea. Izan ere, egungo Eustaten datuen arabera, emakumezkoen ardura izaten baita bi herenean. Azken batean, gizarte-estrukturan antolakuntza bidezko tankeraren erronka itzelaz aritzen zaizkigu partaide diren ikerlariek.

Ordainsaririk gabeko lanaren garrantziaren ikerketa-aitzindari izandako Duranen bi artikuluetan zaintza-politikak aztertzen dira; bereziki, ikusgarritasuna eta nabarmentasuna hartu dutenak egun bizi dugun pandemia-garaia honetan xehatzen dituenak. Egileek zaintzaren estigma, erantzunkidetasun edota alternatiben eskasia aztergai dute nagusiki; baina badira ere azterketa longitudinalak edota munduaren beste muturrean gertatzen direnen berri ematen dizkiguten gaiak jorratzen dituzten artikuluak. Genero-berdintasuna helburutzat dugun aro honetan, ezinbestekoa gertatzen da zaintza-lanaren partekatzea eta profesionalizazioa, eta testua mugarri gerta daiteke balizko antolamendu berrirako.